A Praza de Abastos de Lugo converteuse onte, 20 de decembro, no epicentro da apicultura galega coa celebración da Feira de Nadal organizada por AGA (Asociación Galega de Apicultura). A xornada saldouse cun balance positivo, consolidando este evento como unha cita imprescindible para os amantes do produto de proximidade nestas datas.
Desde a apertura de portas ás 9:00 horas, veciños de Lugo e visitantes achegáronse aos postos para adquirir mel galego de alta calidade directamente das mans das súas produtoras e produtores, sen intermediarios e con todas as garantías de orixe.
Un escaparate para os Meles 5 Estrelas 2025
Un dos grandes atractivos da feira foi a presenza de varios dos gañadores do Concurso Meles 5 Estrelas 2025. Os asistentes tiveron a oportunidade única de conversar cos apicultores premiados, coñecer de preto os seus procesos de produción e entender o esforzo que supón manter a excelencia nun sector que aposta pola biodiversidade e o respecto polo medio ambiente.
Apoio institucional e compromiso co territorio
O éxito desta edición non tería sido posible sen a colaboración do Concello de Lugo e da Deputación de Lugo, nin das e dos apicultores/as presentes, que xunto con AGA, apostan por dar visibilidade a un sector fundamental para o mantemento do noso ecosistema rural.
Desde a Asociación Galega de Apicultura queremos expresar o noso máis profundo agradecemento a todas as persoas que se achegaron á Praza de Abastos. O voso apoio ao mel galego é, en definitiva, un apoio á supervivencia das nosas abellas e á saúde dos nosos montes.
Grazas por facer desta Feira de Nadal un éxito colectivo!
