Telf.: 981 508 142 info@apiculturagalega.gal

APOIO AOS ASOCIADOS E ASOCIADAS DE AGA POLA VAGA DE LUMES DO VERÁN 2022

(20 / 07 / 2022)

 

 

 

Neste mes de xullo, Galicia está sufrindo uns lumes (naturais e provocados) inauditos e desbocados, coma sempre devastadores dos bens materiais humanos e da nosa flora e paisaxe.

Entre outros moitos, o sector apícola estase vendo afectado dun xeito brutal nalgunhas e diversas comarcas de Galicia, pois leva ao abandono forzado nalgúns casos das colonias de abellas e á desaparición de miles de colmeas e centos de alvarizas, quedando en consecuencia a súa contorna queimada polas lapas. Un deserto negro e chamuscado.

Desde a Asociación Galega de Apicultura somos conscientes dos estragos e perdas que o lume está a provocar e da enorme superficie afectada nalgún concello. Isto supón a ruína material en colmeas, no gando apícola e na produción de mel e pole, así como a económica para algúns abelleiros e abelleiras (semi)profesionais. Esta devastación ecolóxica leva á morte da apicultura por uns anos nalgunhas zonas melíferas emblemáticas da nosa xeografía.

A cobertura pola póliza do seguro resulta insuficiente para a reimplantación das colmeas perdidas por algunhas persoas afectadas. O seu valor real delas está lonxe de ser o efectivo.

A solidariedade dalgunha xente da apicultura reclámanos a creación dunha plataforma de axuda aos asociados e asociadas socios de AGA polo lume. Por iso facemos un chamamento a toda a masa asociada da nosa asociación para que de atoparse con asentamentos apícolas favorables, con colmeas ou enxames de abellas sobrantes ou coa posibilidade de realizar núcleos para a vindeira primavera, que se o teñen a ben nolo comuniquen para poder axudar e compensar algúns dos abelleiros afectados gravemente.

O seguimento realizarase baixo o control do número de colmeas inscritas no caderno de explotación, a visualización gráfica dos incendios, a inspección dos peritos do seguro e toda a documentación que se poida achegar. Isto permitirá un pasiño para que ninguén quede sen abellas. Para este efecto podedes contactar e anotarvos nas nosas oficinas en Arzúa.

Así mesmo, solicitamos da Administración autonómica galega, consellerías de Presidencia, do Medio Rural e de Medio Ambiente, o establecemento e a axilización de axudas directas e específicas para colaborar na recuperación do sector apícola nesas zonas afectadas, co obxecto de complementar as coberturas do seguro.

 

 

 

 

 

 

LUMES NON!

Share This
Esta web utiliza cookies propias para su correcto funcionamiento. Al hacer clic en el botón Aceptar, acepta el uso de estas tecnologías y el procesamiento de tus datos para estos propósitos. Mais información
Privacidad