Prazo: ata o 2 de xuño de 2023
A Consellería do Medio Rural está a elaborar o Anteproxecto de Lei de loita integral contra os incendios forestais de Galicia, atopándose nestes intres na fase de escoitar as suxestións que a cidadanía ou as entidades afectadas polo marco normativo da loita contra os incendios forestais na Comunidade Autónoma de Galicia teñan a ben presentar.
A respecto do eido apícola, ten consecuencias sobre o uso do lume nos montes e nos terreos agroforestais nos períodos de perigo alto de incendios, que vén sendo un dos de máis actividade e intervención nos apiarios.
Este anteproxecto de lei ten este enlace: https://transparencia.xunta.gal/tema/informacion-de-relevancia-xuridica/normativa-en-tramitacion/en-prazo-de-envio-de-suxestions/-/nt/0674/anteproxecto-lei-loita-integral-contra-incendios-forestais-galicia , onde se pode ver o contido do seu articulado.
En concreto, véxase sobre todo os artigos 71, «Maquinaria e traballos apícolas», 72 e 98.n), «Infraccións», e 101, as sancións (de 100 a 1.000 €, segundo a Lei estatal 43/2003, de montes —art. 74—), sen esquecer o espírito de todo o texto legal.
Sabemos da problemática que se lles ten presentado a moitos abelleiros e abelleiras durante o verán por parte das autoridades polo uso do afumador nos seus apiarios e os problemas legais que pode carrexar.
Polo tanto, invitamos os nosos socios e socias con experiencia na materia para que nos fagan chegar as súas ideas e suxestións a respecto do uso do afumador na época de períodos de alto perigo de incendios dentro deste texto lexislativo; en concreto, neste ano 2023 xa vén sendo desde o mes de abril en diante, desde o que xa se prohibiron as queimas.
Como usuarios do lume no noso afumador, e ás veces a prudencia non abonda e a prevención tampouco sobra, debemos facer que contemplen o uso obrigatorio del no manexo das colmeas pola nosa parte, e non cargarmos cun equipo de extinción pesado cada vez que vaiamos afumar as colmeas.
Agardamos as vosas ideas, que nos podedes facer chegar a AGA, correo info@apiculturagalega.gal , antes do día 2 de xuño, pois entre todos podemos enmarcar dun xeito adecuado a problemática do uso do lume nos apiarios ou alvarizas.
Un saúdo.
Xunta Directiva de AGA